Lingue

Stampa questo articolo

Olà réstel pa l ladin standard? - La lia per i popui manacés

www.noeles.net

Olà réstel pa l ladin standard?
La Lia per i popui manacés: "La provinzia de Bulsan dess respeté la toponomastica y l lingaz ladin - Mussner ti va do al ejempl di nemisc di ladins"

Encuei (26.09.2003) en ocajion dl di europeich di lingac envieia la lia per i popui manacés la jonta provinziala de Bulsan de dé pro finalmenter a la introduzion dl ladin standard sciche lingaz aministratif. La lia per i popui manacés mostra devers l ejempl dl Cianton di Grijons, olà che l parlament ciantonal à bele da giut tout su l rumantsch grischun (rumanc grijon) sciche lingaz aministratif. Tl 2005 vegniràl ence ensigné tles scoles. Entratant na vijita al parlament ciantonal ova ence l president dl consei regional, Franz Pahl, laudé la politica linguistica dl Cianton di Grijons ti confronc dla mendranza rumancia. Südtirol dess jì do a chest bon ejempl di Grijons y dé al lingaz ladin l medem valour sciche ai autri lingac y declaré l ladin standard sciche lingaz ofizial aministratif. Esperc conscidra l lingaz unitar scrit sciche na "conditio sine qua non" per l souravive de na mendranza linguistica. Propi chest souravive à la jonta provinziala con sia delibera scandal ai prums de chest ann saboté. L ladin standard vegn praticamenter sclut fora da la adoranza tla aministrazion publica, donca na proibizion de n lingaz. Che chest sie na cossa da se daudé, ne él nia da s'en fé marevueia. La jonta ti à tout enscì un di puec strumenc essenziai a la mendranza ladina, dant de tò chesta dezijion ne fòvel vegnù damané degun espert linguistich, tant demanco l raprejentant lité dl consei.

Mendranzes linguistiches zenza n sie lingaz é esponudes a na erojion fatala. Chest vegn ence desmostré da n stude dla comiscion europeica "euromosaic". Do chest stude él plu de meses de chestes mendranzes manacedes te sia esistenza, ajache al ne vegn nia reconesciù sie lingaz o/y ajache al mancia na forma scrita. L grup di esperc dl SPELL à laoré fora ti ultims 15 agn n conzet dret pratich dl ladin standard y ti ultims agn él vegnù laoré fora la gramatica y l dizionar. Mass media ladins desvalifs, sciche la "USC di LADINS" o l portal internet "noeles.net" adora regolarmenter l Ladin Standard. La jonta provinziala endere ne à nience consulté i esperc linguistics dl SPELL y nience valuté i resultac de sie laour, ma ala à tout ex cathedra la dezijion che l Ladin Standard ne sie nia ciamò madur per n'adoranza ativa. Laprò méssen savei che la gran pert di membri dla jonta ne conesc nience na parola de ladin.

L Ladin Standard valessa per duc i ladins dles Dolomites y perchel podèssel daidé pro a superé n puech la tripartizion dla Ladinia te trei provinzies voluda da Benito Mussolini en pruma persona. Ence de chest ne vuel la jonta nia savei.
Nia da capì él en plu, ciuldì che l assessour nia lité, cherdé da defora, lasce verifiché l contribut a la organisazion tet "La Union Generala di Ladins dles Dolomites". É pa chest zensura o recat? La union pòn cumpedé pro i majeri sostegnidours dl Ladin Standard. Mussner spliga chesta verifica dan dant che l govern de coalizion de zenter y man dreta dl Venet ne dae sen nia plu sie sostegn finanziar a la Union Generala. Mussner va enscì do al ejempl nazional propi de chela region che se à dagnora desmostré n gran nemich dles mendarnzes per sia politica de assimilazion.

En ocajion dl di di lingac envieia la lia per i popui manacés la jonta provinziala de adoré l lingaz ladin tles valedes ladines y de respeté la toponomastica. Can che dant da valgun temp ova la lia per i popui bele porté dant chesta ghiranza a la Jonta, fòvel vegnù derevers na reazion de indignazion, ma che entratant ne se àl mudé puech y nia. Truepes scrites dla aministrazion publica é restedes ciamò encuei demé bilinghes, todesch-talian, zenza l lingaz dla populazion locala. Chest comportament vegn dagnora critiché da la jonta sciche "nazionalistich", sce al va contra l grup todesch. Ciuldì che chest comportament vae ben te chest caje y dess ester enfinamai de ejempl, can che al va dla mendranza ladina, ne sà samben degugn.

Inserito da: Veronesi in data 29/9/2003, 17:24
Scritto in Ladino per la parte Lingue di Internet Padano

Condividi:
Modifica questo articolo

Visualizza tutti gli articoli

Focus